In relatief kótte tied hat 45èlf inne ganse eege leedjessjtiel ontwikkeld: sjtuk vuur sjtuk ludieke hymnes in tradisjenele vasteloavessfeer mit ing flinke porsie knoakdruëge humor in ing anekdotisje dubbelzinnigheed. De vasteloavesakt oet Landgraaf is opgerich in 2016 en treënt óngerwiel ‘t vasteloavessezoen ónregelmieësig óp in de Parksjtad en umstrieëke mit zelfgesjrieëve sjlagers en anger (mit)zingbaar matterjaal.
45èlf Won dat ieësjte joar dierek ‘t Oape Landgraafs Carnavalsmoeziek Konkoer (OLCK) mit ‘t leedje Beëter sjeef d'r in.... In 2016 woeëd ’t leedje óch d’r Landgraafsjlager, sjtóng 45èlf óp de Groëete Gulpener Vastelaoves Finale en aafgelope joare in versjillende finales van ‘t Parksjtad Leedjes Konkoer (PLK) en CMC Alaif. Ee good begin, kin me bauw zage; mit bei aavang de vroag of d’r überhaupt ee vervolg zou kómme.
Onnuëzele joeks
“Dat vervolg woar egelik gaar nit de bedoeling. Ich houw alling inne wietsige teks gesjrieëve en doa wool ich get mit. Eemoalig. Zinge en optreëne? Nog nit mesjien.”, vertelt d’r Edwin Peelen va 45èlf. “Dan geeste inins loestere noa vasteloavesreppertwaar en letste ónbewus óp wat mit ‘t sjpassezoen allenui weët gemak aa Limburgse meziek. ’t Vool mich dierek óp dat de vernuiing van d’r meziek mieë en mieë de uëverhank houw óp de humoristisje tekste. Leuke verhöalkes mit ee good begin en ee eind, inne originele kloe, lüj d’r bekinde sjpeegel vuurhaote of humor dieste bei einzelgängers in optochte of buutteredners nog vings, huësjte in leedjes joamer genóg ummer wieëniger. Onnuëzele joeks die de ruë wirklikheed draagliker makt en leunt óp ing gezóng porsie zelfsjpot gemengd mit ee metspuntje satire: ‘t besjteet bekans nit mieë.” D’r Edwin geet wieër: “’t Hoof nit ordinair te weëde, mar ing sjun geformuleerde dubbelzinnigheed kin gee koad. Toch? Vöal lüj zeuke de vernuiing in d’r meziek. Ich in de absurde leedjestekste.” De arrangemente van 45èlf sind da óch tradisjeneel en doarum ummer herkinbaar. “Natuurlik is humor gans persuënlik. Doe makst get mit vöal enthousjasme en plezeer. Da bliet ’t mar de vroag óf angere dat enthousjasme dele.”
Nóg mieë leedjes...
Umdat ‘t vasteloavesblood kruupt woa ’t bekans nit goa kin, koame d’r al sjnel mieë leedjes. In 2017 numt 45èlf 't leedje Ich zien dich waal zitte óp. Ee aod LVK-nómmer mit dialekbewirking. Eind 2017 deed 45èlf es titelverdediger wer mit aan 't OLCK mit óch wer 'ne ege gesjrieëve nómmer ‘Bedórve Woeësj’ óf beëter bekank es Woa is ’t hüske?. D'r nómmer eindigt óp ing gedeelde twieëde plaatsj. In dat joar weëd inne twieëde nómmer ópgenoame mit d'r titel Sjuuf ins effe óp. In 2018 weëd evvel driftig durchgesjrieëve aa nuie nómmere. Mar va binne biste sjun weëd d'r Landgraafsjlager va 2019. Mit dit leedje sjteet 45èlf nit alling in de finale van 't OLCK, 't Heëlesj Sjlagerkonkoer en 't PLK, mar óch de ieësjte kier in de haof finale van 't LVK 2019. Óch 't leedje Midde in die nach weëd good gewardeerd. En wat te dinke van d'r tussjedurch-sjlager Ich bin vroeë dat ich dich nit vergeëte bin in 't noajoar va 2019? D'r vasteloavessjlager Ich haot va mich weëd nit alling Landgraafsjlager 2020, mar óch Sjtadsprinsesjlager en kunt in de finale van 't Heëlesj Sjlagerkonkoer en wer in de haof finale van 't LVK. Óngerwiel de Corona-krises kunt 45èlf mit de ieësjte grienmilledie. D'r nómmer Anlies kunt binne ing weëk óp 6 binne in de L1mbo Top 10 va juni 2020 en bliet óch i juli in die lies. Óndanks d'r vasteloavessjtóp 2021 sjteet 45èlf in de aagepaste haof finale van 't LVK mit 't leedje Doa kriesse zeek mit. Midde in d'r Corona-krises, i aaloop noa ’t Oktoberfes weëd in d’r zoeëmer va 2021 d’r ieësjte Oberkrainer polka Ónduëgend mót ‘t zieë oetgebrach. ’t Oktoberfes geët óch i 2021 nit durch. D’r nuie vasteloavessjlager Alles wat va wiet kunt dat is lekker sjteet waal wer in de haof finale van 't LVK 2022 graat zoeë wie d'r nómmer Es of d'r duuvel d'r mit spilt in de LVK haof finale van 2023.
Rijnlandse vasteloavesoersjprong
45èlf sjrieft alle leedjes zelver en hult zieng teksinspirasie oet 't onduëgende van d'r Nico Ploum, 't sjunne van d'r Wiel Knipa en 't verhoalende va de band Carboon. Op de vroag woar d’r naam 45èlf vandaan kunt, gieët d’r Edwin inne einfache oetlek: “45 is 't nètnummer van 't grutste deel va g'n Parksjtad, woeë Landgraaf deel van oetmak. Elf is zónger twiefel ‘t vasteloavesgekkegetal. Doabeij is de kombinasie va de veer siefers ee knipoog noa 't bekinde 4711: Echt Kölnisch Wasser. Doamit is geliek d’r link gelag mit ózze Rijnlandse vasteloavesoersjprong.”
Edwin sjluut nuchter aaf: “Mar loate vier ’t allenui i gikker geval nit te serieus numme. Oetintelig bliet ’t vasteloavend.”
